ກອງປະຊຸມທາງໄກໃນຫົວຂໍ້ “ສົ່ງເສີມການຮ່ວມມືດ້ານໄອທີລະຫວ່າງອິນເດຍ ແລະ ສປປ ລາວ- ການສ້າງການຮ່ວມມືເພື່ອການເຕີບໃຫຍ່ຂະຫຍາຍຕົວຂອງເສດຖະກິດ.

ໃນຕອນບ່າຍ ວັນພຸດ ທີ 12 ພຶດສະພາ 2021 ທີ່ຜ່ານມາ ສະຖານທູດອິນເດຍ ປະຈຳ ສປປ ລາວ ໄດ້ຈັດກອງປະຊຸມທາງໄກ ໃນຫົວຂໍ້ “ສົ່ງເສີມການຮ່ວມມືດ້ານໄອທີລະຫວ່າງອິນເດຍ ແລະ ສປປ ລາວ- ການສ້າງການຮ່ວມມືເພື່ອການເຕີບໃຫຍ່ຂະຫຍາຍຕົວຂອງເສດຖະກິດ.

ໂດຍການໃຫ້ກຽດເຂົ້າຮ່ວມຂອງ ທ່ານ ປອ ສັນຕິສຸກ ສິມມາລະວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ແລະ ທ່ານ ດິນກ່າ ອາສທານາ ເອກອັກຄະລະຖະທູດ ອິນເດຍ ປະຈຳ ສປປ ລາວ, ທ່ານ ບຸນແນມ ຈວງຫອມ ເອກອັກຄະລະຖະທູດ ລາວ ປະຈຳອິນເດຍ ພ້ອມດ້ວຍບັນດາບໍລິສັດໃນຂະແຫນງ ICT ຈາກລາວ ແລະ ອິນເດຍ.

ນອກຈາກການແລກປ່ຽນຄວາມເຫັນດ້ານທຸລະກິດຕ່າງໆຢ່າງຟົດຟື້ນແລ້ວ, ໃນນັ້ນໄດ້ມີການອະທິບາຍເຖິງການຈັດຕັ້ງປະຕິບັດວຽກງານຂອງ ສູນພັດທະນາ ແລະ ຝຶກອົບຮົມຊອບແວ ລາວ-ອິນເດຍ, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ. ນີ້ເປັນໜຶ່ງຈຸດເລີ່ມຕົ້ນທີ່ສຳຄັນ ໃນການຂະຫຍາຍຂອບການຮ່ວມມືທາງວິຊາການຂອງສູນ. ຫວັງຢ່າງຍິ່ງວ່າສູນຂອງພວກເຮົາ ຈະສາມາດເປັນສ່ວນໜຶ່ງທີ່ປະກອບສ່ວນໃນສ້າງ ແລະ ຖ່າຍທອດຫຼັກສູດໃໝ່ໆ ທີ່ແທດເໝາະ ແລະ ໜ້າສົນໃຈ ອອກສູ່ສັງຄົມໄປເລື້ອຍໆ.